Charme pur chescune manere de fevre : Ki ke veut estre charmé deit prier la charme par charité. E celui qui le deit charmer le deit charmer quel jur il veut estre gari. E il respundra "le tierz jur" e il ne deportera a manger ne a bievre par enchaison de la maladie. "Beau sire, le verrai cors de Vus seit honuré aussi verraiment cum Vus estes Père, Fiz e Seinz Esperiz, treis persones e un Deu. Descendistes en la virgine Marie e pus suffristes mort pur nus peccheurs e pus resuscitastes de mort en vie denz le tierz jur e descendistes en enfern e preistes hors Adam par vostre grant valur, par vostre grant duçur, par vostre grant beauté, par vostre grant humilité. Beau sire, le verrai cors de Vus seit honuré. Aussi veraiement donez santé a ceste home .N. ou a ceste femme .N. E nomez le nom e pus après covient dire .iii. Pater Nostre e .iii. Ave Maria ke Deus lui doine santé.